ജീവിതത്തില് ആകസ്മീകമായി പ്രയാസങ്ങള് നേരിടേണ്ടിവരുമ്പോള്, തികഞ്ഞ ഈശ്വരവിശ്വാസികള്കൂടി പലപ്പോഴും പതറിപ്പോകുന്നത് നേരില് കാണാനിടയായിട്ടുണ്ട്! ശുഭാപ്തിവിശ്വാസികളുടെ നിയമാവലിയില് ഈ പ്രയാസങ്ങളുടെ മദ്ധ്യത്തിലും ഒരു വെള്ളിരേഖ കണ്ടെത്തി, ജീവിതം മുന്പോട്ടുതന്നെ കൊണ്ടു പോകണം എന്ന് ഓര്മ്മിപ്പിക്കുന്നു. ഏതാണ്ട് സമാനമായ, 'സംഭവിക്കുന്നതെല്ലാം നല്ലതിന് മാത്രം' എന്ന് പ്രമാണവുമായി, പല മതങ്ങളും ഈ ചിന്താഗതിയെ പിന്തുണയ്ക്കുന്നുമുണ്ട്!! നിസ്സാരമെന്നു തോന്നാമെങ്കിലും, ചില വര്ഷങ്ങള്ക്ക് മുന്പ് ഉണ്ടായ ഒരു അനുഭവം എന്റെ മനസ്സിനേയും ഈ രീതിയില് ചിന്തിക്കാന് പ്രേരിപ്പിക്കുന്ന വിധത്തിലുള്ള ഒന്നായിരുന്നു!!
ദുബായില് ആദ്യമായി ജോലിക്കു വന്നെത്തിയ നാളുകളില്ത്തന്നെ, ഇവിടെനിന്നും ഒരു ഡ്രൈവിംഗ് ലൈസന്സ് സംഘടിപ്പിക്കുക എന്നുള്ളത്, ഒരു ബാലികേറാമല തന്നെയാണ് എന്ന് ഞാന് മനസ്സിലാക്കിയിരുന്നു!! എങ്കിലും മൂന്ന് ടെസ്റ്റുകള്ക്കുള്ളില് അത് ലഭിച്ചപ്പോഴുണ്ടായ സന്തോഷത്തോടൊപ്പം ഇനി ഏതു കാര് വാങ്ങുന്നതായിരിക്കും നല്ലത്, എന്നുള്ള ആശയക്കുഴപ്പവും എന്നെ ഒരു പ്രതിസന്ധിയിലാക്കിയിരുന്നു!കാരണം ഇവിടെ അത്രയും വൈവിദ്ധ്യമാര്ന്ന കൊതിപ്പിക്കുന്ന വാഹനങ്ങളുടെ ഒരു നീണ്ട നിര
തന്നെ നമ്മെ കാത്തിരിപ്പുണ്ട്! കൂട്ടുകാരില് പലരും ജാപ്പനീസ് നിര്മ്മിത കാറുകളുടെ ഗുണമേന്മയേയും ഇന്ധനലാഭത്തെപ്പറ്റിയുമൊക്കെ വാതോരാതെ വിസ്തരിക്കുമ്പോഴും എന്റെ മനസ്സിലെമ്പാടും ഓടിക്കളിച്ചിരുന്നത് നാട്ടില് ഇടയ്ക്കിടെ കാണാന് കഴിഞ്ഞിരുന്ന ബെന്സ് കാറുകള് തന്നെ ആയിരുന്നു!! അതൊക്കെ ഓടിച്ചുകൊണ്ടുപോകുന്നവരെ അല്പ്പം അസൂയയുള്ള കണ്ണുകളോടെയാണെങ്കിലും, പലപ്പോഴും നോക്കിനിന്നിട്ടുള്ളത് ഞാന് അപ്പോള് ഓര്ത്തു. നാട്ടിലാണെങ്കില് ഒരു ബെന്സ് കാര് സ്വന്തമാക്കണമെങ്കില് കുടുംബം തന്നെ എഴുതി വില്ക്കേണ്ടിവരും എന്നും എനിക്ക് അറിയാമായിരുന്നു. എന്നാല് ഇവിടെ ഒരു മൂന്ന് നാല് വര്ഷം പഴക്കം മാത്രമുള്ള
ഒരു ബെന്സ്കാര് വാങ്ങാന്,അത്ര വളരെ
ഭാരിച്ച തുകയൊന്നും ആവശൃമില്ല എന്നതിനാല് എന്ത് വന്നാലും ശരി ഒരു
ബെന്സ് തന്നെയാകട്ടെ എന്റെ ആദ്യത്തെ കാര് എന്ന് ഞാനുമങ്ങു തീരുമാനിച്ചു!!
കൂട്ടുകാര്ക്കെല്ലാം എതിര്പ്പുണ്ടായിരുന്നെങ്കിലും, പിന്നീട് കാര്യങ്ങള് വളരെ എളുപ്പത്തില്ത്തന്നെ നടന്നുകിട്ടി. സത്യം പറയട്ടെ, ബെന്സ് കമ്പനിയുടെ പ്രശസ്തി പോലെ തന്നെ, അടുത്ത ഏതാനും വര്ഷങ്ങളോളം, മറ്റൊരു വണ്ടിയെപ്പറ്റി ചിന്തിക്കേണ്ട ഒരു സന്ദര്ഭം പോലും ഈ കാര് എനിക്ക് തന്നിട്ടില്ല. അത്ര നല്ല സുഖമുള്ള സേവനമായിരുന്നു അത് അക്കാലമത്രയും എനിക്ക് തന്നുകൊണ്ടിരുന്നത്!! പിന്നീട് എപ്പോഴോ, എന്റെ ബെന്സിനോടുള്ള കമ്പം കുറഞ്ഞതുകൊണ്ടായിരിക്കും, അടുത്ത ഒരു സുഹൃത്തിന് അതിനെ കൈമാറിയതിനുശേഷം, ഞാന് മറ്റൊരു പുതിയ ജാപ്പനീസ് നിര്മ്മിത വാഹനത്തിലേക്ക് ചേക്കേറിയത്!!
എന്തായാലും ഈ പറയാന് പോകുന്ന സംഭവം നടക്കുമ്പോള് ഞാന് ഈ ബെന്സു തന്നെയാണു ഉപയോഗിച്ചിരുന്നത്. പതിവുപോലെ ഒരു പ്രവൃത്തി ദിവസം രാവിലെ, ഞാന് ഫ്ലാറ്റില് നിന്നും താഴെ വന്നു പുറത്തു പാര്ക്ക് ചെയ്തിരുന്ന കാറിനടുത്തെത്തിയതായിരുന്നു. വണ്ടിയുടെ മുന്ഭാഗത്ത് എന്തോ ഒരു പ്രത്യേകത ശ്രദ്ധയില്പ്പെട്ട ഞാന് അടുത്തു ചെന്ന് സൂക്ഷിച്ചുനോക്കുമ്പോഴാണു അതിന്റെ മുന്ഭാഗത്തുള്ള ബമ്പറും അതില് ഉറപ്പിച്ചിരുന്ന നമ്പര് പ്ലേറ്റും കാണാനില്ല എന്ന ദയനീയ സത്യം മനസ്സിലാക്കുന്നത്!! ഇന്നലെ വരെ ഇവ രണ്ടും വണ്ടിയില് ഉണ്ടായിരുന്നല്ലോ എന്ന് ഞാന് ഓര്ത്തു. അഥവാ വൈകുന്നേരത്തെ വീട്ടിലേക്കുള്ള വരവില് താഴെ എങ്ങാനും ഇളകി വീണിട്ടുണ്ടെങ്കില്ത്തന്നെ, മുന്ഭാഗത്തെ ചക്രങ്ങള് അതിനു മുകളിലൂടെ കയറി ഇറങ്ങുമ്പോള് തന്നെ, ഞാന് വിവരം അറിയേണ്ടതല്ലേ? എന്റെ ചിന്ത ആ വഴിക്കായിരുന്നു. അങ്ങനെയാണെങ്കില് ഇവ രണ്ടും ആരോ ആവശ്യക്കാര് ഊരി എടുത്തതകാനാണ് സാദ്ധ്യത. കൃത്രിമ നമ്പര് പ്ലേറ്റു വച്ച് പല കുറ്റകൃത്യങ്ങളും നടത്താനുള്ള സാദ്ധ്യതയും തള്ളിക്കളയാനാവില്ല!!
ഞാന് വേഗം ഞങ്ങളുടെ ബില്ഡിംഗ് സെക്യൂരിറ്റി വിഭാഗത്തിലെ ജോലിക്കാരെ സമീപിച്ചു വിവരം പറഞ്ഞു. എന്നാല് ഒരു ഫ്ലാറ്റിനു ഒരു കാര് മാത്രമേ ബേസ്മെന്റിലുള്ള സൌജന്യ പാര്ക്കിംഗ് ഉപയോഗിക്കാന് അനുമതി ഉള്ളൂ എന്നതിനാലും, ഇത് ഞങ്ങളുടെ തന്നെ രണ്ടാമത്തെ കാര് ആയതിനാലും അത് വെളിയില് കോംപൌണ്ടില് എവിടെയെങ്കിലും മാത്രമേ പാര്ക്ക് ചെയ്യാന് പാടുള്ളൂ. അതുകൊണ്ടുതന്നെ സെക്യൂരിറ്റി ജീവനക്കാര്ക്ക് ഈ വണ്ടിയുടെ ഉത്തരവാദിത്വം ഇല്ല എന്നവര് എന്നെ പറഞ്ഞു മനസ്സിലാക്കി. എങ്കിലും അവര് അന്വേഷിക്കാം എന്ന് ഉറപ്പു തന്നു.
ഓഫീസിലെത്താനുള്ള സമയം അതിക്രമിച്ചിരിക്കുന്നു!! ഞാന് വേഗം അടുത്ത നടപടിയിലേക്ക് കടന്നു. സാധാരണഗതിയില് ഒരു പുതിയ ബമ്പര് വാങ്ങി ഫിറ്റ് ചെയ്താല് തീരുന്ന കാര്യമേ ഉള്ളൂ എങ്കില് ഞാനും അതുതന്നെ ചെയ്യുമായിരുന്നു. എന്നാല് ഇവിടെ പ്രശ്നം അല്പ്പം സങ്കീര്ണമാണ്!! ദുബായില് നമ്പര് പ്ലേറ്റ് കളഞ്ഞുപോയാല് അടുത്തുള്ള പോലീസ് സ്റ്റേഷനില് ചെന്ന് ആദ്യം റിപ്പോര്ട്ട് ചെയ്യണം. അവര് അതിന്റെ സത്യാവസ്ഥ പരിശോധിച്ചതിനുശേഷം ഒരു റിപ്പോര്ട്ട് തരും. അതുമായി വാഹന റെജിസ്ട്രേഷന് ഓഫീസില് ചെന്ന് റിപ്പോര്ട്ട് കൊടുത്ത് ഫീസും അടച്ചാല് പുതിയ നമ്പര് പ്ലേറ്റ് തരും! പറഞ്ഞപ്പോള് എത്ര പെട്ടെന്ന് കാര്യം നടന്നു! എങ്കിലും നാട്ടിലെ അത്രയൊന്നും താമസം വരുകയില്ലെങ്കിലും, ഇതിന്റെ പുറകെയൊക്കെ കുറച്ചെങ്കിലും നടക്കേണ്ടി വരും എന്ന് ഉറപ്പാണ്. ഞാന് ഏതായാലും കാറുമായി ഓഫീസിലേക്ക് പുറപ്പെട്ടു. വഴിയിലെങ്ങും പോലീസ് വണ്ടിയൊന്നും കാണരുതേ എന്നുള്ള പ്രാര്ത്ഥന ഏതായാലും ഫലിച്ചു!!. പോലീസിന്റെ കണ്ണിലൊന്നും പെടാതെ തന്നെ സുഖമായി ഓഫീസിലെത്തി.
സാധാരണ ഞാന് കാര് പാര്ക്ക് ചെയ്യുന്ന സ്ഥലത്തുതന്നെ പാര്ക്ക് ചെയ്തതിനുശേഷം അവിടെയെല്ലാം വെറുതെ എങ്കിലും ഒന്ന് പരിശോധിച്ചു. ഭാഗ്യത്തിന് അവിടെ എങ്ങാനും വീണു കിടപ്പുണ്ടെങ്കിലോ? ഏതായാലും ഒന്നും തന്നെ കാണാഞ്ഞതിനാല് നിരാശനായി ബാഗുമെടുത്ത് ഞാന് ഓഫീസ്സിനുള്ളിലേക്ക് നടന്നു. അപ്പോഴാണ് എന്നെ കാത്തിട്ടെന്നവണ്ണം ഒരു ജോലിക്കാരന് അവിടെ നില്ക്കുന്നത് ഞാന് ശ്രദ്ധിച്ചത്!! എന്നെ കണ്ട ഉടനെ അവന് അടുത്തുവന്നു പറയാന് തുടങ്ങി..
" സാര്, ഇന്നലെ സാര് പോയതിനുശേഷം കാര് പാര്ക്ക് ചെയ്ത സ്ഥലത്തിനരുകില് നിന്ന് ഒരു കാറിന്റെ നമ്പര് പ്ലേറ്റും ബമ്പറും ഇളകിവീണത് ഞങ്ങള്ക്ക് കിട്ടിയിരുന്നു. സാറിന്റേതായിരിക്കില്ല എന്ന് കരുതിയാണ് ഉടനെ വിളിച്ചു ചോദിക്കാതിരുന്നത്. ബമ്പര് ഒന്ന് വന്നു നോക്കൂ സാര്"
അവന് പറഞ്ഞു നിറുത്തിയതും, ഞാന് സന്തോഷത്തോടെ അവനൊപ്പം ചെന്നു. ഇനി എന്ത് പറയാന്! അവ രണ്ടും എന്റെ വണ്ടിയുടേത് തന്നെയായിരുന്നു! ഏതായാലും പോലീസിന്റെ നൂലാമാലകളില് നിന്നും രക്ഷപെട്ട സന്തോഷത്തോടെ ഞാന് രണ്ടു ജോലിക്കാരെ വിളിച്ചു അതെല്ലാം പഴയപടി വണ്ടിയില് ഫിറ്റ് ചെയ്യാന് പറഞ്ഞിട്ട് ഓഫീസില് വന്നു ഇരുന്നു. വാസ്തവത്തില് സംഭവിച്ചത് എന്തായിരിക്കും എന്ന് എനിക്ക് അപ്പോള് മനസ്സിലായി. വണ്ടി പാര്ക്ക് ചെയ്യുന്നതു റോഡില്നിന്നു അല്പ്പം സ്ലോപ്പ് ആയി കിടക്കുന്ന, ചുമരിനോട് ചേര്ന്നുള്ള ഒരു സ്ഥലത്താണ്. മറ്റു വാഹനങ്ങളും അപ്പുറത്തും ഇപ്പുറത്തുമായും പാര്ക്ക് ചെയ്തിട്ടുണ്ടാവും!! വലിയ വാഹനങ്ങളാണ് ഇവിടെ പാര്ക്ക് ചെയ്യുന്നതെങ്കില് സ്ഥലത്തിന് റോഡിലേക്കുള്ള ചരിവ് കാരണം, അബദ്ധവശാല് വാഹനം തനിയേ ഉരുണ്ടു റോഡിലേക്ക് ഇറങ്ങാതിരിക്കാനായി, പുറകിലെ ടയറുകള്ക്ക് വലിയ കല്ലുകള് കൊണ്ട് അട വയ്ക്കുമായിരുന്നു. പലപ്പോഴും ഞാന് കാര് റിവേര്സ് എടുത്തു റോഡിലേക്ക് ഇറക്കുമ്പോള് ഈ കല്ലുകളില് ചിലത് മുന്വശത്തെ ബമ്പറില് അറിയാതെ തട്ടുമായിരുന്നു. ഇന്നലെയും അതുതന്നെ സംഭവിച്ചിരിരിക്കും. ആ തട്ടലില് ബമ്പര് ഇളകി വീണതൊന്നും ഞാനും ശ്രദ്ധിച്ചിട്ടുണ്ടാവില്ല!! കാര് റിവേര്സില് റോഡിലേക്ക് ഇറങ്ങുന്നതിനാല്, അഥവാ ബമ്പര് ഇളകി വീണിട്ടുണ്ടെങ്കില്ക്കൂടി, ടയറുകള് അതിനു മുകളില് കൂടി കയറി ഇറങ്ങുന്ന പ്രശ്നവും ഇല്ലല്ലോ! അതുകൊണ്ട് തന്നെ ഈ നടന്ന സംഭവമൊന്നും ഞാനുമറിയാതെ പോയി!!!
ഇതിനകം ബമ്പര് ഫിറ്റ് ചെയ്യാന് പോയവര് ഉടന്തന്നെ വീണ്ടും എന്നെ കാണാന് വന്നപ്പോള് ഞാന് അക്ഷരാര്ത്ഥത്തില് അസ്വസ്ഥനായി.
"ഇനി എന്താണ് പ്രശ്നം?"
എന്റെ വാക്കുകള്ക്കു കനം വച്ചിരുന്നത് ഞാന് അറിഞ്ഞില്ലെന്നു നടിച്ചു.
"സാര് ഒന്നുകൂടി കാറിന്റെ അടുത്തുവരെ വന്നാല് നന്നായിരുന്നു..."
അവരില് ഒരുവന് പറഞ്ഞു നിറുത്തി.
ഞാന് ഒന്നും പറയാതെ അവരോടൊപ്പം വീണ്ടും കാറിന്റെ അടുക്കലേക്ക് നടന്നു. എനിക്ക് അപ്പോഴേക്കും അവരോടു അല്പം ഈര്ഷ്യ തോന്നിത്തുടങ്ങിയിരുന്നു. ബമ്പര് ഒന്നും ഇതുവരെ ഫിറ്റ് ചെയ്തിരുന്നില്ല!! അതുകൊണ്ടുതന്നെ മുന്വശത്തെ രണ്ടു ടയറുകളുടെയും ഏതാണ്ട് നല്ല ഭാഗവും മുന്പില് നിന്നും നോക്കുമ്പോള് ശരിക്കും വ്യക്തമായി കാണാമായിരുന്നു. അവരിലൊരുവന് പെട്ടെന്ന് കുനിഞ്ഞു ഒരു ടയറിന്റെ മുന്വശം തൊട്ടുകാണിച്ചിട്ടു പറഞ്ഞു..
"നോക്കൂ സാര്, ഈ ടയറിന്റെ ഈ ഭാഗം രണ്ടിഞ്ചു നീളത്തില് കീറി ഇരിക്കയാണ്!! അല്പ്പം കൂടി ഡീപ് ആയിരുന്നെങ്കില് ഇതിനകം ഇത് പൊട്ടിപ്പിളരുമായിരുന്നു!! ഇപ്പോള് കണ്ടുപിടിക്കാന് കഴിഞ്ഞത് സാറിന്റെ ഭാഗ്യം തന്നെ!!!"
അവന്റെ വാക്കുകള് എന്നെ സ്തബ്ദനാക്കി!! അതുവരെ അവരോടു തോന്നിയ ഈര്ഷ്യയെല്ലാം എവിടെയോ പോയിമറഞ്ഞു!! ശരിയല്ലേ? ഞാന് ആലോചിച്ചു. ദുബായിലെ നല്ലവരായ പോലീസ് പല തവണ വാഹനങ്ങളുടെ ടയറുകള് കുറ്റമറ്റതായിരിക്കണം എന്ന് എല്ലാ മീഡിയവഴിയും മുന്നറിയിപ്പ് തന്നിരുന്നതൊക്കെ എന്റെ ഓര്മ്മയില് പെട്ടെന്ന് തെളിഞ്ഞു വന്നു. എങ്കിലും എന്റെ വണ്ടിക്കു ഓഫീസിനും വീടിനുമിടയിലുള്ള ചെറിയ ദൂരം മാത്രമേ ദിവസവും ഓട്ടം ഉണ്ടായിരുന്നുള്ളൂ എന്നതിനാലും, എന്റെ ടയറുകളുടെ ബട്ടണുകള് ഇപ്പോഴും വലിയ തേയ്മാനം ഇല്ലാതെ കണ്ടിരുന്നതിനാലും, ടയറുകളുടെ കാര്യത്തില് ഞാന് വേണ്ടത്ര ശ്രദ്ധ ചെലുത്തിയിരുന്നില്ല എന്നുള്ളതായിരുന്നു സത്യം!! ദുബായിലെ റോഡുകളില് മിനിമം ഒരു എണ്പത്/നൂറ് കി.മി. സ്പീടിലെങ്കിലും വണ്ടി ഓടിച്ചേ മതിയാവൂ. അങ്ങനെതന്നെ ദിവസവും സാധാരണഗതിയില് പോയിക്കൊണ്ടിരുന്ന എന്നെ കാത്തു, അപകടം അടുത്തു തന്നെ ഒരു ടയര് പൊട്ടിത്തെറിയുടെ രൂപത്തില് പതിയിരുപ്പുണ്ടായിരുന്നു എന്നുള്ളതും, ഒരു വാസ്തവം തന്നെ ആയിരുന്നില്ലേ? അന്ന് ഞാന് അറിയാതെയാണെങ്കിലും ആ ബമ്പര് ഊരി വീഴാനും, അതുവഴി ആ ടയറിന്റെ സ്ഥിതി എനിക്ക് കാണിച്ചുതരുവാനും, ഏതു ശക്തിയാണ് ഇത്ര കൃത്യമായി പ്രവര്ത്തിച്ചത്?
ആവോ? 'സംഭവിച്ചതെല്ലാം നന്മക്കായി മാത്രം' എന്ന് വിശ്വസിക്കാനല്ലാതെ ഇന്നും എനിക്കതിനുമാത്രം
ഒരു ഉത്തരം ഇല്ല!!!ഒരു പക്ഷെ നിങ്ങള്ക്കെങ്കിലും????
ഉത്തരമില്ലാത്ത ഒരുപാട് “യാദൃച്ഛികങ്ങള്”
ReplyDeleteഈ യാദൃച്ഛികങ്ങള് നന്മക്കായി മാത്രം സംഭവിക്കുമ്പോള് ഉത്തരവും ലഭിച്ചുകഴിഞ്ഞു എന്ന് വിശ്വസിക്കാനാനിഷ്ടം!!!
ReplyDeleteവരവിനും അഭിപ്രായത്തിനും നന്ദി അജിത് മാഷേ....
ജീവിതം അല്ലേ . എല്ലാം വരുന്നതു പെട്ടെന്ന് ആകും . @PRAVAAHINY
ReplyDeleteപ്രീതാ,ഇവിടെ വന്നുനോക്കുവാനും ഒരു അഭിപ്രായം എഴുതിയിട്ട് പോകുവാനും കാണിച്ച സന്മനസ്സിനു നന്ദി പറഞ്ഞോട്ടെ!!
ReplyDeleteപ്രീത പറഞ്ഞത് ശരിതന്നെയാണ്.ജീവിതത്തില് പലതും സംഭവിക്കുന്നത് പെട്ടെന്നാണ്, മുന്നറിയിപ്പൊന്നുമില്ലാതെ.എല്ലാം നല്ലതിനുതന്നെ എന്ന് വിശ്വസിക്കാം!!!
പ്രിയ ഏട്ടാ,
ReplyDeleteകുറച്ചു ദിവസം ബ്ലോഗില് കയറാന് കഴിഞ്ഞില്ല. ഏട്ടന്റെ കൂടെ എപ്പോഴും ദൈവമുണ്ട്...ഏട്ടന്റെ എഴുത്തില് നിന്ന് തന്നെ ആ മനസിന്റെ നന്മ ഞാന് തിരിച്ചറിയുന്നു.
സ്നേഹത്തോടെ
അശ്വതി
പ്രിയ അശ്വതി.
ReplyDeleteകുറച്ചുദിവസമായി കാണാത്തതിനാല് വിചാരിച്ചു ഈ വഴി ഒക്കെ മറന്നു കാണുമെന്ന്!!
പിന്നെ എഴുതുന്നതൊക്കെ എപ്പോഴും എല്ലാവര്ക്കും ഇഷ്ടപ്പെടണം എന്നൊന്നുമില്ലല്ലോ!!
ഏതായാലും വന്നതിലും അഭിപ്രായം എഴുതിയതിനും നന്ദി...
സ്നേഹത്തോടെ,
പ്രിയ ഏട്ടാ,
Deleteഏട്ടന് എഴുതുന്നത് വായിക്കാന് ഈ അനിയത്തിക്ക് എന്നും കഴിയണം എന്ന പ്രാര്ത്ഥന മാത്രം!!!!
സ്നേഹത്തോടെ
അശ്വതി
മോഹന്.
ReplyDeleteഅങ്ങനെ വലിയൊരപകടം
അദൃശ്യ കരങ്ങളാല് മാറ്റപ്പെട്ടു
അവതരണം ഇഷ്ടായി !
"സകലതും നന്മക്കായി കൂടി
വ്യാപരിക്കുന്നു" എന്നാ അര്ത്ഥത്തില് ഒരു
വചനം ബൈബിളില് ഉണ്ട്
ഞങ്ങള് ക്രൈസ്തവ വിശ്വാസികള്
ഒരു നല്ല പങ്കും അങ്ങനെ വിശ്വസിക്കുകയും ചെയ്യുന്നു.
റോമാ ലേഖനം 8 ആം അദ്ധ്യായം 28 ആം വാക്യം.
ബ്ലോഗില് ചേരുന്നു.
ബ്ലോഗില് വന്നതിലും കമന്റു തന്നതിലും നന്ദി
വീണ്ടും കാണാം
പ്രിയ ഏരിയല് മാഷേ,
ReplyDeleteഇവിടെ കടന്നു വന്നു,പോസ്റ്റ് വായിച്ചു,നല്ല വാക്കുകള് രേഖപ്പെടുത്തി, ഒടുവില് ബ്ലോഗില് ചേരുകയും ചെയ്തു!!വെറും ഒരു സാധാരണ ബ്ലോഗര്ക്ക് ഇതില് കൂടുതല് സന്തോഷം വേറെ എന്താണുള്ളത്??
നന്ദിയും സന്തോഷവും അറിയിക്കട്ടെ!! മാഷേ,മാഷിന്റെ എല്ലാ പോസ്റ്റുകളും വായിക്കാറുണ്ട്.
എല്ലാം തന്നെ വിജ്ഞാനപ്രദങ്ങളും എന്തെങ്കിലും ഒരു സന്ദേശം ഉള്ക്കൊള്ളുന്നതും!!
വീണ്ടും കാണാം!!
സ്നേഹത്തോടെ,
യാദൃശ്ചികമായതും അല്ലാത്തതുമായ ഒരുപാട് കാര്യങ്ങള് ജീവിതത്തില് സംഭവിക്കുന്നു. മനുഷ്യശക്തിക്ക് അതീതമായി ഒന്നുമില്ല എന്ന് അഭിമാനിക്കുന്ന, വിവേകബുദ്ധിയുള്ള ജീവി എന്ന് അഭിമാനിക്കുന്ന മനുഷ്യന് പലപ്പോഴും ഉത്തരം കിട്ടാതെ പകച്ചുപോകാറുണ്ട്. പ്രകൃത്യാലുള്ള/ദൈവീകമായ ഒരു വസ്തുത അതിനു പിന്നില് ഉണ്ടാകും. സംഭവാമി യുഗേ യുഗേ. അതെ, സംഭവിച്ചതും നല്ലതിന്, സംഭവിക്കാനുള്ളതും നല്ലതിന്.
ReplyDeleteപ്രിയ ഡോക്ടര്,
ReplyDeleteഡോക്ടര് അഭിപ്രായപ്പെട്ടതുപോലെ പ്രകൃത്യാലുള്ള അല്ലെങ്കില് ദൈവീകമായ ഒന്ന്
ഇങ്ങനെയുള്ള അസാധാരണ സംഭവങ്ങള്ക്ക് പിന്നിലുന്ടെന്നു വിശ്വസിക്കാനാണ്
എനിക്കുമിഷ്ടം!!
വരവിനും വായനയ്ക്കും ഇവിടെ പകര്ത്തിയ ചിന്തകള്ക്കും നന്ദി!!